~::പുല്ലൂരിന്റെ പംക്തി::~

ശുഭം!

2006-12-05T23:56:00.000-08:00

ശുഭം!
അങ്ങനെ വേളി-യും റിസപ്ഷന്‍ തുടങ്ങിയ അനുബന്ധ ചടങ്ങുകളും ഭംഗിയായി കഴിഞ്ഞ്‌ ഞാന്‍ ഒറ്റക്ക്‌ :( ജര്‍മമനിയില്‍ തിരിച്ചെത്തി.
ഇവിടെ വന്നപ്പോ ഗവേഷണം ഒക്കെ ഒരു വഴിക്കാണ്‌!! പോകുന്നത്‌ എന്ന്‌ എന്റെ ഗുരു സ്നേഹപൂര്‍വം പറഞ്ഞപ്പോ അതിന്റെ ടെന്‍ഷനില്‍ ആയിരുന്നത്‌ കൊണ്ടാണ്‌ ഈ വഴി വരാന്‍ താമസിച്ചത്‌. ക്ഷമിക്കുമല്ലോ അല്ലേ!
കമന്റുകളായും,ഇ-കത്തുകളായും, നേരിട്ടും,വിളിച്ചും ആശംസകളും അനുഗ്രഹങ്ങളും തന്ന എല്ലാവര്‍ക്കും എന്റെയും ആത്തുള്ളാളുടേയും! നന്ദി നമസ്കാരം!

രണ്ട്‌ ദിവസം മുമ്പ്‌ തന്നെ വന്ന് ഞങ്ങളെ അനുഗ്രഹിച്ച സു-നും ചേട്ടനും, വിവാഹത്തില്‍ പങ്കെടുത്ത കരീം മാഷിനും പ്രത്യേകം നന്ദി നമസ്കാരം.

വേളി -ടെയും മറ്റ്‌ ചടങ്ങുകളുടെയും കുറച്ച്‌ ഫോട്ടോകള്‍ ഇവിടെ ഉണ്ട്‌. സമയക്കുറവ്‌ കാരണം ഒന്നും ഒരു ഓര്‍ഡറില്‍ അല്ലാ ഇട്ടിരിക്കുന്നത്‌.

അപ്പോ എല്ലാവര്‍ക്കും നന്ദി നമസ്കാരം!

വേളി ക്ഷണം!

2006-10-03T07:02:00.000-07:00

എന്റെ വേളി(വിവാഹം) -ടെ ക്ഷണം എല്ലാ ബൂലോഗ കൂട്ടുകാര്‍ക്കുമായിട്ട്‌ ഇവിടെ ഇടുന്നു (ഇംഗ്ലിഷിലും മലയാളത്തിലും !). സ്കാന്‍ ചെയ്ത്‌ കിട്ടാന്‍ കുറച്ച്‌ താമസം ഉണ്ടായതുകൊണ്ടാണ്‌ ഇത്‌ ഇവിടെ ഇടാന്‍ വൈകിയത്‌. അപ്പൊ എല്ലാവരും വരണം ട്ടോ. ഞങ്ങളെ അനുഗ്രഹിക്കണം. എല്ലാവരുടെയും അനുഗ്രഹങ്ങളും ആശിര്‍വാദങ്ങളും ഉണ്ടാവണേ എന്ന പ്രാര്‍ത്ഥനയോടെ

സസ്നേഹം,
‍സ്വന്തം പുല്ലൂരാന്‍

ചില ചിത്രങ്ങള്‍

2006-09-17T02:08:00.000-07:00

കുറേ ദിവസമായി യാതൊരു ആക്റ്റിവിറ്റി ഇല്ലാത്തതുകൊണ്ട്‌ ബ്ലോഗ്‌ അടിച്ച്‌ പോവോ ന്ന്‌ ഒരു പേടി..

അപ്പോളാ കൈപ്പള്ളിയുടെ "മയില്‍" -നെ കാണുന്നത്‌.. ന്നാ പിന്നെ എന്റെം വക കിടക്കട്ടെ ചില മയില്‍ ചിത്രങ്ങള്‍ ന്ന്‌ കരുതി.

ഇത്‌ ഞാന്‍ രണ്ട്‌ മാസം മുമ്പ്‌ പോളണ്ടിന്റെ തലസ്ഥാനമായ വാര്‍സോ/വാര്‍ഷോ (Warsaw) -യില്‍ പോയപ്പോ അവിടുത്തെ പ്രസിദ്ധമായ ലഷെങ്കി പാര്‍ക്കില്‍ (Lazienki Park) നിന്നും എടുത്തതാണ്‌!

-----------------------------------------------------------------------

ഓണാശംസകള്‍ !

2006-09-03T02:29:00.000-07:00

ഓണാശംസകള്‍!
എല്ലാവര്‍ക്കും ഐശ്വര്യ സമ്പൂര്‍ണ്ണമായ ആഹ്ലാദം നിറഞ്ഞ ഓണം ആശംസിക്കുന്നു..!

കവിതകള്‍

2006-07-17T09:09:00.000-07:00

എന്റെ കയ്യിലുള്ള ചില കവിതകള്‍ ഇതാ ഇവിടെ ഇടുന്നു

മനസ്വിനി
കാവ്യനര്‍ത്തകി
ആ പൂമാല
മാമ്പഴം
ആലായാല്‍ തറ വേണം
വീണപൂവ്‌
ആത്മരഹസ്യം
ഗോതമ്പുമണികള്‍
കല്യാണസൌഗന്ധികം
ഒമ്പതുപേരവര്‍..
ആത്മാവില്‍ ഒരു ചിത

കൃഷ്ണപക്ഷത്തിലെ പാട്ട്‌

‌താടക

സമര്‍പ്പണം: കുടിയന്‌ --
ഇതൊക്കെ കുടിയന്റെ ശബ്ദത്തില്‍ കേള്‍ക്കാന്‍ ആഗ്രഹം ഉണ്ട്‌ ട്ടോ

വേളി നിശ്ചയം കഴിഞ്ഞു

2006-06-11T01:18:00.000-07:00

എന്റെ വേളി നിശ്ചയം കഴിഞ്ഞു.
ഇന്നലെ ആയിരുന്നു. പെണ്‍കുട്ടിയുടെ പേര്‌ മനീഷ. ബേസിക്കലി എടപ്പാളില്‍ നിന്നാണ്‌. പക്ഷേ സെറ്റ്‌ല്‌ഡ്‌ ഇന്‍ ഡല്‍ഹി. ഹമേശാ ഹിന്ദി മേം‍ ബോല്‍ത ഹൈ.. ഹും.. ഹോ..!! ലേകിന്‍ മേരാ ഹിന്ദി സീറോ ഹൈ.. ഹും !! ;-) ക്യാ കരൂം?

നിശ്ചയം എടപ്പാളില്‍ മനീഷയുടെ ഇല്ലതു വെച്ചായിരുന്നു. വേളി ഈ വരുന്ന തുലാമാസം 8 ന്‌ (ഒക്ടോബര്‍ 25, ബുധനാഴ്ച). കുടുതല്‍ വിവരങ്ങളും ക്ഷണവും ഒക്കെ വഴിയേ അറിയിക്കുന്നതാണ്‌. എല്ലാ ബൂലോഗ കൂട്ടുകാരും വരണം. ഇപ്പൊ തന്നെ തീയ്യതി നോട്ട്‌ ചെയ്തോളു. വിവാഹം എന്റെ ഇല്ലത്ത്‌ വെച്ചു തന്നെ ആണ്‌ (മഞ്ചേരിക്കടുത്ത്‌!)

അപ്പോ പറഞ്ഞപോലേ.. ഒക്ടോബര്‍ 25, ബുധനാഴ്ച എല്ലാരും മഞ്ചേരിയില്‍ വരണം. വേളി-യില്‍ പങ്കെടുക്കണം.

വേണ്ട ഏര്‍പ്പാടുകള്‍ ചെയ്യുന്നതാണ്‌. വരണം.. ട്ടോ..

കലേഷ്‌ ഭായ്‌ ... ടിപ്‌സ്‌ വല്ലതും ഉണ്ടെങ്കില്‍ പോരട്ടെ.. ആദ്യായിട്ട്‌ വേളി കഴിക്കായതോണ്ട്‌ ഒരു ടെന്‍ഷന്‍ ഇല്ലാതില്ലാ ;-)

തണുപ്പനു വേണ്ടി ...

2006-06-10T03:47:00.000-07:00

തണുപ്പനു വേണ്ടി ... തിരുന്നാവായ!!

തണുപ്പന്റെ പോസ്റ്റ്‌ വായിചപ്പൊളാണ്‌ ന്നാ പിന്നെ .. ഇപ്രാവശ്യം നാട്ടില്‍ പൊയപ്പൊ (കുറേ അമ്പലങ്ങള്‍ വിസിറ്റ്‌ ചെയ്ത കൂട്ടത്തില്‍) എടുത്ത തിരുന്നാവയ (ഭാരതപ്പുഴ) ചിത്രങ്ങള്‍ ഇവിടെ ഇടാം എന്നു കരുതി!

വിഷു ആശംസകള്‍

2006-04-14T01:41:00.000-07:00

വിഷു ആശംസകള്‍
എല്ലാവര്‍ക്കും എന്റെ ഐശ്വര്യ സമൃദ്ധമായ വിഷു ആശംസിയ്ക്കുന്നു!!

നാട്ടില്‍ നിന്നും മിനിഞ്ഞാന്ന്‌ തിരിച്ചെത്തി. ചില പുതിയ വിശേഷങ്ങളുമായി.. സമയമാവുമ്പോള്‍ എല്ലാം അറിയിക്കാം! ഈ അവസരത്തില്‍ കലേഷിനു പ്രത്യേകം നന്ദി പറയട്ടേ. കലേഷിന്റെ ഒരു എക്സ്‌പീരിയന്‍സ്‌ വായിച്ച്‌ പ്രിപയേഡ്‌ ആയിട്ട്‌ പോയതുകൊണ്ട്‌ എല്ലാം ശുഭം!!!

പോരുന്ന അന്ന്‌ നമ്മളുടെ ബിന്ദു ഓപ്പോളിനെ വിളിച്ചിരുന്നു. ഓപ്പോള്‍ എല്ലാ ബ്ലോഗര്‍ സുഹൃത്തുക്കളോടും അന്വേഷണം പറയാന്‍ പ്രത്യേകം പറഞ്ഞിട്ടുണ്ട്‌..

അപ്പോള്‍ തത്‌ക്കാലം നിര്‍ത്തട്ടെ.. ഇനി ചൂടോടെ ഗവേഷണം തുടരട്ടേ..

ഒരു മാസത്തെ ബ്ലോഗ്‌ കള്‍ വായിച്ച്‌ തീര്‍ക്കാനുണ്ട്‌ ... അതെല്ലാം കഴിഞ്ഞ്‌ പതുക്കെ സമയം കിട്ടുമ്പോള്‍ വീണ്ടും വരാം.. ഇനിയിപ്പൊ പഴയതിനേക്കാള്‍ കൂടുതല്‍ സമയം ISD വിളിക്കണം. ;) ചിലവ്‌ ചുരുക്കേണ്ടി വരും!!

രചന

2006-03-06T00:38:00.000-08:00

രചന മലയാളം സോഫ്റ്റ്‌വെയറിനെക്കുറിച്ച്‌ പുതിയ ലക്കം മലയാളം വാരികയില്‍ വന്ന ഒരു റിപ്പോര്‍ട്ട്‌ ഇവിടെ ഉണ്ട്‌. ഒരു പക്ഷേ സിബു,പെരിങ്ങോടന്‍,വിശ്വം,കെവിന്‍ തുടങ്ങിയവര്‍ക്ക്‌ വായിക്കാന്‍ താത്‌പര്യം ഉണ്ടാവും എന്ന്‌ കരുതുന്നു!

ഗൃഹാതുരത്വം തുളുമ്പുന്ന ചില ഫോട്ടോകള്‌

2006-03-01T01:38:00.000-08:00

ഗൃഹാതുരത്വം തുളുമ്പുന്ന ചില ഫോട്ടോകള്‌

ഇന്നു fwd മെയില്‍ വഴി കിട്ടീതാ.. ന്നാ പിന്നെ എന്റെ ബ്ലോഗര്‍ കൂട്ടുകാര്‍ക്ക്‌ കാണാനായി ഇവിടെ ഇടാം എന്നു കരുതി.
ഈ ഫോട്ടോകള്‍ കണ്ടതോടെ നാട്ടില്‍ പോകാന്‍ ഒന്നും കൂടി ധൃതി ആയി..!!
ഫോടോകള്‍ എടുത്ത അജ്ഞാതന്‌ നന്ദി നമസ്കാരം!!
-----------------------

ക്ഷമിക്കൂ..
ഫോട്ടോകള്‍ എടുത്ത്‌ മാറ്റി!

---------------------------------------------------------------------------------------
താത്പര്യമുള്ളവര്‍ക്ക്‌ ഞാന്‍ ഇത്‌ fwd ചെയ്ത്‌ തരാം!

ഞാനും നാട്ടില്‍ പോവാണേ..!!

2006-02-28T13:07:00.000-08:00

ഞാനും നാട്ടില്‍ പോവാണേ..!!

അടുത്ത ആഴ്ച നാട്ടില്‍ പോകുന്നതാലോചിച്ച്‌ ഞാന്‍ ഇവിടേ ആകെ .... ഒരു വല്ലാത അവസ്ഥയിലാ..!!

സത്യം പറഞ്ഞാല്‍ ഞാന്‍ കഴിഞ്ഞ ഞായരാഴ്ച പോവണ്ടതാ.. ഇവിടെ work സംബന്ധമായ തിരക്കു കാരണം പോക്ക്‌ നീട്ടേണ്ടിവന്നു.. വിഷമം ഉണ്ടായിരുന്നു.. പക്ഷേ എന്താ ചെയ്യാ,, നമ്മുടെ work മേറ്റീവ്ച്ച്‌ നാട്ടില്‍ പോയാല്‍ ചിലപ്പൊ പിന്നെ ഇങ്കട്‌ വരണ്ടാ ന്ന്‌ ബന്ധപ്പെട്ടവര്‍ പറഞ്ഞേക്കും.. അപ്പൊ പിന്നെ ഇതിലും കഷ്ടാ..
പക്ഷേ ഇപ്പോ നാട്ടില്‍ പോണ ചിന്ത മാത്രമാണ്‌ മനസ്സില്‌ ..
അതുകൊണ്ടു തന്നെ work ല്‍ ഒന്നും ശ്രദ്ധ കിട്ട്‌ണൂല്ല്യ...!!!
ഇനിയിപ്പോ കുറച്ച്‌ ഷോപ്പീങ്ങ്‌ ഒക്കെ ചെയ്യണം..!! ആകെ മൊത്തം തിരക്കാണ്‌... !!
11 ാ‍ം തീയ്യതി രാവിലെ ശ്രീലങ്കന്‍ എയര്‍വേയ്സ്‌ കരിപ്പൂര്‌ വിമാനത്താവളത്തിലെ റണ്‍വേ തൊടമ്പോ... !!! എന്തു രസായിരിക്കും.. !!
പിന്നെ അന്ന്‌ ബന്ദും ഹര്‍ത്താലും ഒന്നും ഉണ്ടാവാഞ്ഞാ മതിയായിരുന്നു..!!

നാട്ടില്‍ എങ്ങനാ ... ഇപ്പൊ നല്ല ചൂടുണ്ടാവോ ആവോ..?

ഇന്ന്‌ എന്റെ പിറന്നാള്‌ ..

2006-02-24T02:54:00.000-08:00

ഇന്ന്‌ എന്റെ പിറന്നാള്‌ ..മലയാള കലണ്ടര്‍ പ്രകാരം കുംഭ മാസത്തിലെ പൂരാടം

രാവിലെ സാധാരണയില്‍ കൂടുതല്‍ സമയം ഈശ്വര പ്രാര്‍ഥനക്കും, തേവാരത്തിനും മറ്റും ആയി ചിലവഴിച്ചാതൊഴിചാല്‍ മറ്റു ദിവസങ്ങളില്‍ നിന്നും പ്രത്യേകിച്ച്‌ ഒരു മാറ്റവും ഇല്ലാത്ത ഒരു ദിവസം.

രാവിലേ തന്നെ ഇല്ലത്തേക്ക്‌ വിളിച്ചു. ഞാന്‍ ഇല്ലെങ്കിലും, അച്ഛനും അമ്മയും അഫന്മാരും ചെറിയമ്മമാരും എല്ലാം കൂടീ എന്റെ പിറന്നാള്‍ ആഘോഷിക്കുന്നുണ്ട്‌ എന്നറിഞ്ഞപ്പോല്‍ ഒരു സന്തോഷം.!

കുറച്ച്‌ നേരം ഭക്തി ഗാനങ്ങള്‍ കേള്‍ക്കാം എന്നു വിചാരിച്ച്‌ എന്റെ audio ശേഖരം തപ്പിയപ്പോള്‍ ദാ കിടക്ക്‌ണു പൂന്താനത്തിന്റെ ജ്ഞാനപ്പാന. കുറച്ച്‌ നേരം അതും കേട്ട്‌, ഒരു ഗ്ലാസ്‌ ചായയും കുടിച്ച്‌ (സത്യത്തില്‍ വിഷമം തോന്നി.. ഇല്ലത്തായിരുന്നെങ്കില്‍ കിഴക്കോട്ട്‌ തിരിഞ്ഞിരുന്ന്‌, മുന്നില്‍ നിലവിളക്കു കത്തിച്ച്‌ വെച്ച്‌, വാട്ടിയ വാഴ ഇലയില്‍ അമ്മ വിളമ്പി തരുന്ന സദ്യ വട്ടങ്ങളോട്‌ കൂടിയ സമൃദ്ധമായ ഒരു ഉൌണ്‌ ആണ്‌ സാധാരണ പിറന്നാളിന്റെ അന്ന്‌ രാവിലെ പതിവ്‌..) അവിടെ നിന്ന്‌ ഇറങ്ങി. നേരേ institute -ല്‍ എത്തി പതിവ്‌ പോലെ നമ്മുടെ work തുടങ്ങി.

ഉച്ചക്ക്‌ മെന്‍സ (യൂണിവേഴ്‌സിറ്റി കാന്റീന്‌) യില്‍ എന്താ veg menu എന്ന്‌ നോക്കിയപ്പോ അല്ലേ..!!
"Griessbrei mit Zimt & Zucker"
ന്ന്‌ പറഞ്ഞാല്‍ "റവ പായസം" പോലെ ഇരിക്കുന്ന ഒരു സംഭവം.. റവ യില്‍ പാലൊക്കെ ഒഴിച്ച്‌ ഉണ്ടാക്കീട്ട്‌ അതില്‍ പഞ്ചസാരയും കുറച്ച്‌ കറുവപ്പട്ട ഒക്കെ പോടിച്ചിട്ട്‌ ഉള്ള ഒരു വിഭവം. റവ കൊണ്ടുള്ളതായാലെന്താ .. അപ്പോ പിറന്നാളായിട്ട്‌ പായസോം!! ഇതില്‍ പരം എന്താനന്ദം.. ഇന്നതെ ദിവസം കുശാല്‍..!!.

അപ്പൊ ശരി.. നേരം ശ്ശി വൈകി.. പോയി പായസം കഴിക്കട്ടേ..!! എങ്ങിനെ ആവോ.. സ്വാദ്‌ണ്ടാവോ..?

ജ്ഞാനപ്പാന വേണ്ടവര്‍ ഇവിടെ ക്ലിക്ക്‌ ചെയ്തോളൂ..

ക്രിസ്തുമസ്‌ നവവത്സര ആശംസകള്‍ !!!

2005-12-24T02:32:00.000-08:00

ക്രിസ്തുമസ്‌ നവവത്സര ആശംസകള്‍ !!!

ബൂലോഗ നിവാസികളെ... പ്രിയ കൂട്ടുകാരേ...

എല്ലാ ബ്ലോഗീ ബ്ലോഗന്മാര്‍ക്കും എന്റെ സ്നേഹം നിറഞ്ഞ ക്രിസ്തുമസ്‌ നവവത്സരാശംസകള്‍ !!!

ജര്‍മ്മന്‍ ഭാഷയില്‍ പറയാണെങ്കില്‍

Frohe Weihnachten und Prosit Neujahr !!!

ചെമ്പൈ കച്ചേരി കേള്‍ക്കാന്‍ താത്‌പര്യമുണ്ടോ..?

2005-12-15T13:23:00.000-08:00

ചെമ്പൈ കച്ചേരി കേള്‍ക്കാന്‍ താത്‌പര്യമുണ്ടോ..?

ചെമ്പൈ കച്ചേരി കേള്‍ക്കാന്‍ താത്പര്യമുള്ളവര്‍ക്കു ഇതാ ഇവിടെ പോയാല്‍ അദ്ദേഹത്തിന്റെ ചില കച്ചേരികല്‍ mp3, zip ഫോര്‍മാറ്റുകളില്‍ ഡൌണ്‍ലോഡ്‌ ചെയ്യാം.

സമയം കിട്ടാണെങ്കില്‍ ഇവിടെയും ഒന്നു പോയി നോക്കൂ..
ആവാച്ചാല്‍ ഈ യാഹൂ ഗ്രൂപ്പിലും ചേരാം..

മൊബൈല്‍ ഫോണ്‍ ഉപയോഗിക്കുമ്പോള്‍..

2005-12-06T09:04:00.000-08:00

ഇതു ഒരു ഫോര്‍വേഡഡ്‌ മെയിലില്‍ നിന്നു ..

മൊബൈല്‍ ഫോണ്‍ ഉപയോഗിക്കുംബോള്‍.. ഇടത്തേ ചെവി ഉപയോഗിക്കുക .. വലതു ചെവി ആവുമ്പോ അതു ബ്രെയിന്‍ നെ നേരിട്ടു ബാധിക്കും ത്രേ.. !!! ശരിയാണോ എന്നറിയില്ല്യ..

ഇന്‍ഡ്യന്‍ ക്രിക്കറ്റ്‌ : ചപ്പല്‍ ഇഫക്‌ട്‌

2005-12-06T05:10:00.000-08:00

ഇന്‍ഡ്യന്‍ ക്രിക്കറ്റ്‌ : ചപ്പല്‍ ഇഫക്‌ട്‌ / ചാപ്പല്‍ ഇഫക്ട്‌ !!!

ഇടവേളക്കു ശേഷം ..

2005-12-03T11:51:00.000-08:00

ഇടവേളക്കു ശേഷം ..

തിരക്കായിരുന്നു. ഒരു ചെറിയ ഇടവേളക്കു ശേഷം ബൂലോഗത്തിലേക്കു ഒന്നു എന്ത്തി നോക്കാണ്‌. കുറേ അധികം ബൂലോഗങ്ങള്‍ വായിച്ച്‌ തീര്‍കാനുണ്ട്‌.

പിന്നെ കാണാം

റാഗിങ്‌ .... പീഢനം

2005-11-15T01:21:00.000-08:00

റാഗിങ്‌

ഇന്നതെ കേരളകൌമുദിയിലും മാതൃഭൂമിയിലും റാഗിങ്ങിന്റെ പേരില്‍ ചിലര്‍ ഒരു പാവം പെണ്‍കുട്ടിയെ പീഢിപ്പിച്ചു എന്ന വാര്‍ത്ത വായിച്ച്‌ തല പെരുക്കുന്നു. എന്റെ രോഷം ഭയങ്കരമായിരിക്കുന്നു. അവരേ കയ്യില്‍ കിട്ടിയാല്‍ പിച്ചി ചീന്തി ..... കശക്കും ഞാന്‍...
ഭഗവാനേ എനിക്ക്‌ കംട്രോള്‌ തരില്ല്യേ.... ?

കഴിഞ്ഞ കൊല്ലം "ശാരി" ആയിരുന്നു പീഢനത്തിന്റെ ഇര. അതു സീരിയല്‍ അഭിനയിപ്പിക്കാം എനു പരഞ്ഞു കൊണ്ടുപോയിട്ട്‌. ഇന്നിപ്പോ പഠിക്കാന്‍ വന്ന ഒരു പാവം പെണ്‍കുട്ടി. അതു ഒത്തു പുറത്തറിയിക്കാതിരിക്കാന്‍ പ്രിന്‍സിപ്പലും ഒക്കെ കൂട്ടു നിന്നു എന്നും വാര്‍ത്ത. വാര്‍ത്തകള്‍ എത്രത്തോളം സത്യമാണെന്നറിയില്ല. എന്നാലും ഇതൊക്കെ വായിച്ച്‌ ഇന്നത്തെ എന്റെ മൂഡ്‌ കംപ്ലീറ്റ്‌ പോയി.
കേരളത്തില്‍ ഇങ്ങനെ പല സംഭവങ്ങളും നടക്കുന്നു. ചിലതു ലോകം പുറത്തറിയുന്നു. അതില്‍ ചിലത്‌ വാര്‍ത്താ പ്രാധാന്യം കിട്ടുന്നു. ഈശ്വരാ "ഒരു നല്ല കേരളം" എന്ന എന്റെ പ്രതീക്ഷ ... എന്നാണാവോ ഒരു ഇതരം അക്രമങ്ങളില്‍ നിന്നും മുക്തമാകുന്ന ഒരു കേരളം ഉണ്ടാവ.. അറിയില്ല്യ..

റാഗിങ്ങിനെ കുറിച്ച്‌...
ഇതു ഒരു നല്ല പ്രവനതയാണെന്ന അഭിപ്രായം എനിക്കില്ല്യ. ഒന്നും അതിരു കടക്കരുത്‌.
എഞ്ചിനീയറിംഗിനു പഠിക്കുമ്പോള്‍ സീനിയര്‍ വിദ്യാര്‍ഥികള്‍ എന്നെ റാഗ്‌ ചെയതിരുന്നെങ്കിലും അതു വളരെ സിമ്പിള്‍ ആയ രസകരമായ രീതിയില്‍ ആയിരുന്നു. പാട്ട്‌ പാടിപ്പിക്കുക, ചില ഗോഷ്ഠികള്‍ കാനിപ്പിക്കുക, തുടങ്ങിയവ. അതു ഒരിക്കലും തന്നെ ഒരു ഉപദ്രവമായോ അല്ലെങ്കില്‍ ബുധിമുട്ടായോ എനിക്കു തോന്നിയിരുന്നില്ല്യ. സീനിയര്‍ വിദ്യാര്‍ത്ഥികളുമായി കൂടുതല്‍ അടുക്കാനും സുഹൃത്‌ ബന്ധം സ്ഥാപിക്കാനും അതു കാരണം സാദിച്ചു. മാത്രമല്ല വളരെ ഇണ്ട്രോവേര്‍ട്ട്‌ ആയിരുന്ന, കുറച്ച്‌ ഷൈ ടൈപ്പ്‌ ആയ ഞാന്‍ അതു കാരണം ആക്ടീവ്‌ ആയി മാറിയിട്ടുണ്ട്‌.

പിന്നെ ഞാന്‍ സീനിയര്‍ ആയപ്പോ, ചില ജൂനിയര്‍ വിദ്യാര്‍ത്ഥികളേ റാഗ്‌ ചെയ്യാന്‍ പോയി. പിന്നീട്‌ എന്തു നടന്നു എന്നു ഞാന്‍ ആരോടും പരഞ്ഞില്ല്ല്യ.!!! കാരണം രാഗ്‌ ചെയ്യാന്‍ പോയ സീനിയര്‍ വിദ്യാര്‍ത്ഥിയെ ജൂനിയര്‍ വിദ്യാര്‍ത്ഥികള്‍ തിരിച്ച്‌ റാഗ്‌ ചെയ്തു എന്ന സത്യം ആരും അറിയാതിരിക്കാന്‍ !!!

പിന്നെ കാണാം..

2005-11-13T04:01:00.000-08:00

തിരക്കിനിടയിലും ബ്ലോഗ്‌ വായനയും കമന്റടിയും നടക്കുന്നുണ്ടെങ്കിലും ബ്ലോഗാന്‌ സമയം കിട്ടുന്നില്ല്യ.

അപ്പൊ പിന്നെ കാണാം

ഒരു കസ്റ്റംസ്‌ അനുഭവം

2005-11-04T01:06:00.000-08:00

ഇന്നത്തെ കേരളകൌമുദിയിലെ ഈ വാര്‍ത്ത കണ്ടപ്പോള്‍, ഞാന്‍ കഴിഞ്ഞ്‌ പ്രാവശ്യം കരിപ്പൂര്‍ എയര്‍പോര്‍ട്ടില്‍ ഇറങ്ങിയപ്പോ ഉണ്ടായ ഒരു അനുഭവം ഓര്‍മ്മ വന്നു. കരിപ്പൂര്‍ മഞ്ചേരിക്കടുത്തായതുകൊണ്ട്‌ എനിക്കു കരിപ്പൂരില്‍ തന്നെ ഇറങ്ങണമെന്നതു ഒരു ആഗ്രഹമായിരുന്നു. അതിനാല്‍ നെടുംബാശ്ശേരിയിലേക്കോ ഒന്നും ട്രൈ ചെയ്യാതെ ശ്രീലങ്കന്‍ വിമാനത്തിനു ഫ്രാങ്ക്ഫര്‍ട്ടില്‍ നിന്നും കൊളംബോ വഴി കോഴിക്കോട്ടേക്കു ടിക്കറ്റ്‌ എടുത്തു. അത്ര വല്യേ സുഖമുല്ല റൂട്ട്‌ അല്ല. എന്നാലും നാട്ടിനടുത്ത്‌ ഇറങ്ങാലോ എന്ന്‌ വിചാരിച്ചാണ്‌ അങ്ങനേ ചെയ്തത്‌.
കരിപ്പൂരില്‍ ഇറങ്ങി, ലഗ്ഗേജ്‌ ഒക്കെ എടുത്ത്‌ ക്ലിയറിങ്ങിനായി ചെന്ന എണ്ടെ അടുത്ത്‌ അവിടെ നിന്ന ഒരു സ്ത്രീ ചോദിച്ചു - "കയ്യില്‍ സ്വര്‍ണ്ണമുണ്ടോ..?" വിമാനം ലേറ്റ്‌ ആയതു കാരണം ഇല്ലത്ത്‌ നിന്നും വന്ന അനിയനും, അഫനും ഒക്കെ പുറത്ത്‌ കുറേ നേരമായിട്ട്‌ കാത്ത്‌ നിക്കുന്നുണ്ടാവും, അതോ പരിഭ്രമിക്കോ, എവിടെയാണ്‌ നിക്കുന്നുണ്ടാവാ എന്നിങ്ങനെ ഒറൊന്നു ആലോചിച്ചിരിക്കുകയായിരുന്നാ ഞാന്‍ ആ ചോദ്യം കേട്ടപ്പോ ഒന്നു ഞെട്ടി. ആദ്യമായിട്ടണങ്ങനെ ഒരു ചോദ്യം. ഇതിനു മുമ്പു രണ്ടു പ്രാവശ്യവും ഞാന്‍ മദ്രാസില്‍ ആണ്‌ ഇറങ്ങിയിരുന്നത്‌. അന്നൊന്നും ആരും ഇതു ചോദിച്ചില്ല്യ. ഇനിയിപ്പോ എന്നെ കണ്ടാല്‍ സ്വര്‍ണ്ണം കൊണ്ടുവരുന്നവനാണെന്ന്‌ തോന്നോ..? ഏയ്‌.. ചാന്‍സ്‌ ഇല്ല്യ. എന്തായാലും പെട്ടന്നുള്ള ആ ചോദ്യത്തില്‍ ഒന്നു പകച്ച ഞാന്‍ ഒരു ചെറിയ പേടിയോടു കുടി എന്റെ അരയിലുള്ള ചരടിന്മേല്‍ ചെറിയ ഒരു സ്വര്‍ണ്ണ തകിട്‌ കോര്‍ത്തിട്ടുണ്ടെന്നു പറഞ്ഞു. (.. അതു പണ്ടു കുട്ടിയായിരിക്കുമ്പോ അമ്മത്തെ മുത്തശ്ശന്‍ ജപിച്ച്‌ കെട്ടിയതാ ) "അതല്ല പെട്ടിയില്‍ സ്വര്‍ണ്ണമുണ്ടോ ?" "ഇല്ല്യ മാഡം .." ഞാന്‍ ഒരു സഹതാപത്തോടെ അവരെ നോക്കി പരഞ്ഞു..

ഉറപ്പാണോ..?
ഉം ..
ആ ന്നാ പൊയ്ക്കോ ..

അല്ലെങ്കിലും യൂറോപ്പില്‍ നിന്നു ആരെങ്കിലും സ്വര്‍ണ്ണം കൊണ്ടോവോ..? അവരുടെ ഒരു കാര്യം. എനിക്കു ചിരിയും വിഷമവും ഒക്കെ വന്നു.

ഇങ്ങനേ ഒരനുഭവം ആദ്യമായിട്ടായിരിക്കാം .. എനിക്കെന്തോ വല്ലാണ്ട്‌ ആയി.
സ്വര്‍ണ്ണം കള്ളത്തരത്തില്‍ കൊണ്ടു വരുന്ന ഒരു ആളേപ്പോലേ എന്നെ കുറച്ച്‌ നേരത്തേക്കെങ്കിലും അവര്‍ സംശയിച്ചത്‌ എനിക്കത്ര പിടിച്ചില്ല്യ.. പിന്നെ എങ്ങിനെയേങ്കിലും പുറത്ത്‌ കടന്ന്‌ വീട്ടുകാരേ കാണാനുല്ല ധൃതിയില്‍ ഞാന്‍ എല്ലാം മറന്നു.

അപ്പോ പറഞ്ഞ്‌ വരുന്നത്‌ ഈ വാര്‍ത്തയില്‍ നിന്നും എനിക്കു മനസ്സിലാകുന്നത്‌ കസ്റ്റംസ്‌ നിയമങ്ങല്‍ ശരിക്കറിയാത്ത താരതമ്യേനേ വിദ്യാഭ്യാസം കുറവായ (പ്രതേകിച്ചും മലപ്പുറം ഭാഗത്തു നിന്നും ഉള്ള )ശരാശരി ഗള്‍ഫ്‌ കാരെ ആണ്‌ ഇവര്‍ കൂടുതല്‍ മുതലെടുക്കുക.
പാവങ്ങള്‍ കഷ്ട്ടെപ്പെട്ടുണ്ടാക്കിയ പൈസ തഞ്ചത്തില്‍ അടിച്ചെടുക്കുന്ന ഇവരൊന്നും നന്നാകും എന്നെനിക്കു തോന്നുന്നില്ല്യ.

കള്ളക്കടത്ത്‌ ആയി വരുന്നവരുണ്ട്‌ എന്നു ഞാന്‍ സമ്മതിക്കുന്നു. പക്ഷേ അവരൊക്കെ കൂളായി പുറത്ത്‌ വരും. അവരേ തൊടാന്‍ ആരും ധൈര്യപ്പെടില്ല്യ. മുകളിലുള്ളവര്‍ക്കു കൈ മടക്കു കൊടുത്ത്‌ കാര്യം നേടും. പക്ഷേ താഴേക്കിടയിലുള്ള ഉദ്യോഗസ്ഥര്‍ക്കു കേറി മേയാന്‍ പാവപ്പെട്ട ഗള്‍ഫ്‌ കാരും.. കഷ്ടം..
എന്നാണിതിനൊക്കെ ഒരു അവസാനം...

കേരളപ്പിറവി ആശംസകള്‍

2005-10-31T12:34:00.000-08:00

എല്ലാവര്‍ക്കും എന്റെ ഹൃദയം നിറഞ്ഞ കേരളപ്പിറവി ആശംസകള്‍

ഈ കേരളപ്പിറവി ദിനത്തില്‍ എന്റെ മലയാളി സുഹൃത്തുക്കള്‍ക്ക്‌ വായിക്കാനായി "കേരളം കേരളമായത്‌" എന്ന ഒരു ലേഖനതിന്റെ ലിങ്ക്‌ തരുന്നു. ഈ ലേഖനം സെപ്റ്റംബര്‍ മാസത്തിലെ മലയാളം വാരികയില്‍ പ്രസിദ്ധീകരിച്ചതാണ്‌. ലേഖകന്റെ പേര്‌ കെ ടി രവിവര്‍മ്മ.
ആ ലേഖനം പി ഡി എഫ്‌ ഫൈല്‍ ഫോര്‍മാറ്റ്‌ ല്‍ ആണ്‌.

റഷ്യന്‍ കഥകള്‍

2005-10-31T06:42:00.000-08:00

കുട്ടിക്കാലത്ത്‌ വായിച്ച്‌ രസിച്ചിരുന്ന, മലയാളത്തിലേക്കു തര്‍ജ്ജമ ചെയ്യപ്പെട്ട ചില റഷ്യന്‍ പുസ്ത്കങ്ങള്‍ -- "കുട്ടികളുടെ കഥകളും", "നാടോടി കഥകളും", മറ്റു നോവലുകളും എന്റെ മനസ്സില്‍ വീണ്ടും ഓടി വന്നത്‌ രണ്ട്‌ മൂന്നാഴ്ച മുമ്പ്‌ ആയിരുന്നു. കൃത്യമായി പറഞ്ഞാല്‍ ബെന്നിയുടെ ബ്ലോഗില്‍ ഒരു റഷ്യന്‍ കഥയെക്കുറിച്ചും കഥാകൃത്തിനെക്കുറിച്ചുമുള്ള ഒരു പരാമര്‍ശം വായിച്ചപ്പൊഴാണ്‌ ആ പഴയകാല ഓര്‍മ്മകള്‍ തികട്ടി വന്നത്‌. നിര്‍ഭാഗ്യവശാല്‍ അന്നു വായിച്ച ആ പുസ്തകങ്ങളൊന്നും തന്നെ എന്റെ പുസ്തക ശേഖരത്തില്‍ ഉള്‍പ്പെടുത്താന്‍ കഴിഞ്ഞിരുന്നില്ല്യ. ഇപ്പൊ അവ കിട്ടാന്‍ വല്ല മാര്‍ഗ്ഗവും ഉണ്ടോ എന്നന്വേഷിച്ചപ്പോഴാണറിഞ്ഞത്‌, അവ പ്രസിദ്ധീകരിച്ചിരുന്ന പ്രഭാത്‌ ബുക്ക്‌ ഹൌസ് ഇപ്പൊ അതരം തര്‍ജ്ജമകള്‍ ഇറക്കുന്നില്ല്യ എന്നു. അതായത്‌ ആ മനോഹര പുസ്തകങ്ങള്‍ ഇനി മലയാളത്തില്‍ ഇറങ്ങാന്‍ ഒരു സാധ്യതയും ഇല്ലെന്ന്‌. സോവിയറ്റ്‌ യൂണിയന്‍ തകര്‍ന്നതോടു കൂടി, പ്രസിദ്ധീകരണങ്ങള്‍ക്കുള്ള ഫണ്ടിങ്‌ നിലച്ചു. അതായിരിക്കാം കാരണം. അങ്ങനെ ഇരിക്കുമ്പോഴാണ്‌ ഇന്നു ഒരു സുഹൃത്ത്‌ ഈ ലിങ്ക്‌ അയച്ചു തന്നത്‌. ഇംഗ്ലീഷിലേക്കു തര്‍ജ്ജമ ചെയ്യപ്പെട്ട ചില മനോഹര റഷ്യന്‍ കഥകള്‍ ആ വെബ്‌ സൈറ്റില്‍ ഉണ്ട്‌. ഇംഗ്ലീഷില്‍ ആയാലെന്താ.. ആ നല്ല കഥകള്‍ വീണ്ടും വായിക്കാന്‍ ഒരു അവസരം കിട്ടല്ലേ..!!

ആ ലിങ്കിലേക്കു പോവാന്‍ ഇവിടെ ക്ലിക്ക്‌ ചെയ്യൂ..!!

the owner of the website says "In the USSR this kind of English language publishing was regarded as propaganda. When the USSR disintegrated the financing stopped and most of those publishing houses collapsed. The books are not likely to be published again in the near future. The aim of this tiny collection is to keep those translations alive."

എന്തായാലും ഈ ഒരു സംരംഭത്തെ അഭിനന്ദിച്ചേ മതിയാവൂ.. കുട്ടിക്കാലത്തെ വായനകളിലേക്ക്‌ വീണ്ടും ഒരു തിരിച്ച്‌ പോക്ക്‌..!!

തിരക്കാണ്‌

2005-10-22T10:06:00.000-07:00

ചില സാങ്കേതിക തടസ്സങ്ങള്‍ കാരണവും, ജോലി സംബന്ധങ്ങളായ തിരക്കുകള്‍ കാരണവും ഈ ഭാഗത്തു കൂടി അധികം വരാന്‍ പറ്റുന്നില്ല..

കരയരുത്‌

2005-10-20T00:50:00.000-07:00

ലാസ്റ്റ്‌ രണ്ട്‌ പോസ്റ്റ്‌ കല്‍ക്കുല്ല ഉത്തരം (ഇതു വായിച്ച്‌ ആരും ചിരിച്ചില്ലെങ്കിലും കരയരുത്‌ !!)

ആനയോട്‌ ദേഷ്യം വന്ന ഉറുമ്പുകള്‌ ആനപ്പുറത്തിരിക്കുന്ന ഉറുമ്പിനോട്‌ പറഞ്ഞു ...

മുക്കി കൊല്ലടാ ഓനേ.. !!(മലപ്പുറം സ്റ്റെയില്‌)

ചിത്രം തരുന്ന സന്ദേശം

കൂട്ടുകാര്‍ക്ക്‌ ഒരു പക്ഷേ നിങ്ങലെ വലിച്ച്‌ മുകളില്‍ കയറ്റാന്‍ സാധിച്ചില്ലെന്നു വരാം...

എന്നാലും

അവര്‍ നിങ്ങള്‍ താഴെ വീഴാതിരിക്കാനുല്ല വഴികള്‍ ആലോചിക്കും

പറയാമോ.?

2005-10-19T12:51:00.000-07:00

ഈ ചിത്രം തരുന്ന സന്ദേശം എന്താണെന്നു പറയാമോ..?

നുറുങ്ങു കഥ fwd:

2005-10-19T05:40:00.000-07:00

നുറുങ്ങു കഥ fwd:
ഒരു ദിവസം കുറേ ഉറുമ്പുകള്‍ കാട്ടിലെ ഒരു പുഴയില്‍ കുളിക്കാന്‍ ആയി ഇറങ്ങി. അപ്പോ ആ വഴി വന്ന ഒരു ആനയും അതില്‍ കുളിക്കാന്‍ ഇറങ്ങി. ആന ഒന്നു മുങ്ങി പൊങ്ങിയപ്പോള്‍ ഒരു ഉറുമ്പൊഴിച്ച്‌ ബാക്കി എല്ലാ ഉറുമ്പുകളും ആ ഓളത്തില്‍ പെട്ട്‌ കരയ്ക്കടിഞ്ഞു. ഒരു ഉറുമ്പ്‌ മാത്രം എങ്ങിനേയോ ആനയുടെ തലയില്‍ പറ്റിപ്പിടിച്ചിരുന്നു.

കരയില്‍ അടിഞ്ഞ ഉറുമ്പുകള്‍ അപ്പോള്‍ ദേഷ്യം വന്ന്‌, ആനയുടെ തലയില്‍ ഇരുന്ന ഉറുമ്പിനോട്‌ എന്താണ്‌ വിളിച്ച്‌ പറഞ്ഞതെന്നു പറയാമോ..?
!!

"ഞമ്മള്‌ ഇബ്‌ട്‌തന്നെ ണ്ടേ.." !!!

2005-10-08T11:02:00.000-07:00

എന്റെ ബ്ലോഗർ സുഹൃത്തുക്കളേ..
എല്ലാർക്കും സുഖാണല്ലോ അല്ലേ..?

കഴിഞ്ഞ ആഴ്ച സ്ഥലത്തില്ലായിരുന്നു. ഒരു ഗ്രൂപ്പ്‌ മീറ്റിങ്‌ ന്‌ ആയി ഫ്രൈബർഗ്‌ -ൽ പോയിരുന്നു. ഫ്രൈബർഗ്‌ യൂണിവേഴ്സിറ്റി ആയി ഞങ്ങൾക്ക്‌ കൊളാബറേഷൻ ഉണ്ട്‌. മീറ്റിങ്‌ ഒക്കെ ഭംഗിയായി കഴിഞ്ഞു തിരിച്ചെത്തി.

ഫ്രൈബർഗ്‌ എന്ന സ്ഥലം "ബ്ലാക്ക്‌ ഫോറെസ്റ്റ്‌" അഥവാ "കറുത്ത കാട്‌" ന്‌ പ്രസിദ്ധമാണ്‌. പറഞ്ഞ്‌ കേട്ടപ്പോ ഞാൻ വിചാരിച്ചു അത്‌ വല്ല ഭയങ്കര കാടായിരിക്കും ന്ന്‌. ചെന്നപ്പളല്ലേ... കുറെ പൈൻ മരങ്ങൾ തിക്കി തിരക്കി വളർന്നിരിക്കുന്നു.. അത്ര മാത്രം.. ഒരു കാടിന്റെ ഫീലിങ്‌ ഒന്നും ഇല്ല്യ. പിന്നെ എന്റെ ജർമൻ കൊളീഗ്‌സിനെ സമാധാനിപ്പിക്കാനായി ഞാൻ "ഭയങ്കരം","കിടിലം" "ഹോ.." ന്ന്‌ ഒക്കെ വെച്ച്‌ കാച്ചി. ഇവരൊന്നും നമ്മുടെ നാട്ടിലെ കാട്‌ കണ്ടിട്ടില്ല്യ.. അതാ!!..

കുറെ ബ്ലോഗ്‌ കൾ വായിക്കാനുണ്ട്‌.

തത്ക്കാലം നിർത്തുന്നു..
എല്ലാർക്കും സുഖമാണെന്ന വിശ്വാസത്തോടെ...

പുല്ലൂരാൻ

അയ്യോ എനിക്ക്‌ ഭീഷണി...

2005-10-02T07:57:00.000-07:00

ഇവിടെ ഹൈഡൽബർഗ്‌ യൂണിവേഴ്സിറ്റിയിൽ ഇൻഡ്യൻ സ്റ്റുഡന്റ്സിന്റെ ഒരു സംഘടന ഉണ്ട്‌. ഈ സംഘടനയിൽ എല്ലാ ഭാഗത്തു നിന്നും ഉള്ള ആൾക്കാർ ഉണ്ട്‌.. നോർത്ത്‌, സൌത്ത്ത്‌, എല്ലാം. ഇവിടെയും സംഘടനയിൽ ഉൾപ്പോരുകൾ, തൊഴുത്തിൽ കുത്ത്‌ എന്നിവ ധാരാളം ഉണ്ട്‌. ചിലപ്പോൾ നമ്മുടെ നാട്ടിലെ പൊളിറ്റിക്സിനെ വരേ നാണിപ്പിക്കുന്ന നാടകീയ രംഗങ്ങൾ ഉണ്ടാവാറുണ്ട്‌.
രണ്ടാഴ്ച മുമ്പായിരുന്നു ഇലക്ഷൻ. സാധാരണ ഈ കാര്യങ്ങളിൽ തീരേ താൽപര്യം കാണിക്കാത്ത ഞാൻ ഇപ്രാവശ്യം രംഗത്തിറങ്ങി. അതിന്‌ കാരണമുണ്ട്‌. ഈ അസോസിയേഷന്റെ ചില ഭാരവാഹികൽ തമ്മിലുണ്ടായ ഇടച്ചിൽ കാരണം, വോട്ടേഴ്സ്‌ ലിസ്റ്റ്‌ ഉണ്ടാക്കിയപ്പോൾ, ചിലരുടെ പേരെല്ലാം എടുത്ത്‌ മാറ്റി. ഒരു ഭാഗം മറുഭാഗത്തെ ആൾക്കാരുടെ പേരും, മറുഭാഗം ഈ ഭാഗത്തെ ആൾക്കരുടെ പേരും.. അങ്ങനെ. പല പരിപാടികളും. പിന്നീട്‌ അതിന്റെ പേരിലായി അടി. അവസാനം അവർ എന്തോ പരഞ്ഞ്‌ ഒത്ത്‌ തീർപ്പായി.

പക്ഷേ അവസാനം ലിസ്റ്റ്‌ വന്നപ്പോ എന്റെ പേരില്ല. ഈ ഗ്രൂപ്പിലൊന്നും പെടത്തതു കൊണ്ട്‌ എന്റെ പേര്‌ ലിസ്റ്റിൽ ചേർക്കാൻ ആരും മുന്നോട്ട്‌ വന്നില്ല്യ. എനിക്ക്‌ അത്‌ കണ്ടപ്പോ വാശി കയറി.

ഞങ്ങൾക്ക്‌ ഒരു യാഹൂ ഗ്രൂപ്പ്‌ ഉണ്ട്‌. ആ ഗ്രൂപ്പിൽ ഞാൻ ഒരു ഒറ്റയാനയേ കണക്കെ എന്റെ അവകാശത്തിന്‌ വേണ്ടി അട്ടഹസിച്ചു. എന്റെ പേര്‌ ലിസ്റ്റിൽ ചേർക്കാത്തതിനെ കുറിച്ച്‌ ഞാൻ വാദിച്ചു. അങ്ങനെ എന്റെ പേരും ചേർത്ത്‌ കിട്ടി.പക്ഷേ ഇലക്ഷന്‌ ഞാൻ പോയില്ല. !!! ഞാൻ പണ്ടേ പറഞ്ഞതാ നമ്മുടെ ഏരിയ അല്ല അത്‌ ന്ന്‌.

ഇന്നലെ ഞങ്ങളുടെ യാഹൂ ഗ്രൂപ്പിൽ ഒരാൾ (ടിയാൻ ഇപ്പോ ഭരണതിൽ ഇരിക്കുന്ന കമ്മിറ്റിയിലെ ഒര്‌ അംഗമാണ്‌) ഒരു മെയിൽ അയച്ചു:-

"ഈ മാസം ഇവിടെ അടുത്തുള്ള സിറ്റി ആയ മാൻഹൈം - ൽ മാതാ അമൃതാനന്ദമയി വരുന്നുണ്ട്‌ താത്പര്യമുള്ളവർക്ക്‌ പോയി കാണാം" എന്നതായിരുന്നു അതിന്റെ സാരം.
ഈ മെയിൽ അയച്ച കക്ഷി "അമ്മ" യുടെ ഒരു ഫാൻ ആണ്‌. എനിക്ക്‌ അമ്മ, ബാബ തുടങ്ങിയ കാര്യങ്ങളിൽ വല്യേ താത്പര്യം ഇല്ല. എന്നിരുന്നാലും, അത്തരം വിശ്വാസമുള്ളവരോട്‌ എതിരഭിപ്രായവും ഇല്ല. "വ്യക്തി സ്വാതന്ത്ര്യം"... അതിൽ നമ്മൾ ഇടപെടാറില്ല്യ. അപ്പൊ പറഞ്ഞ്‌ വരുന്നത്‌ -- ഇതറിഞ്ഞ സ്ഥിതിക്ക്‌ എന്നാൽ മാൻഹൈം-ഇൽ പോയി വെറുതേ അമ്മയേ ഒന്ന്‌ കണ്ട്‌ കളയാം എന്ന്‌ മനസ്സിൽ വിചാരിക്കും ചെയ്തു.

അപ്പോഴാണ്‌ ഗ്രൂപ്പിൽ വേറേ ഒരുത്തന്റെ മറുപടി കണ്ടത്‌.
"ജർമ്മനിയിലും മാൻഹൈം-ഇലും ദിവസവും എത്രെയോ ഇൻഡ്യക്കാർ വരുന്നുണ്ട്‌ അത്‌ വിളിച്ചരിയിക്കാൻ ഈ യാഹൂ ഗ്രൂപ്പ്‌ ഉപയോഗിക്കരുത്..‌ പ്ലീസ്‌ ഡോണ്ട്‌ റൈറ്റ്‌ ദിസ്‌ കൈൻഡ്‌ ഓഫ്‌ മെയിൽ ഇൻ ദിസ്‌ ഗ്രൂപ്പ്‌".
അവൻ അങ്ങനെ എഴുതാനുണ്ടായ കാരണം എന്താണെന്നെനിക്കറിയില്ല്യ.. ഒരു പക്ഷേ അവന്‌ ഈ അമ്മ- തുടങ്ങിയ കാര്യങ്ങളിൽ വിശ്വാസം ഉണ്ടാവില്ല. അല്ലെങ്കിൽ ആദ്യം മെയിൽ അയച്ചവനോട്‌ എന്തെങ്കിലും വ്യക്തി വിദ്വേഷം കാണും ഒരു പക്ഷേ അവർ രണ്ട്‌ ഗ്രൂപ്പിൽ പെട്ടവരായിരിക്കാം..

ഇതൊന്നും ചിന്തിക്കാതേ അപ്പൊ ഞാൻ ഗ്രൂപ്പിൽ എഴുതി..

"താങ്കൾ ഇങ്ങനെ സംകുചിത മനോഭാവം കാണിക്കരുത്‌. അവൻ ഒരു ഇൻഫോർമേഷൻ പാസ്‌ ചെയ്തതല്ലേ ഉള്ളൂ.." (അങ്ങനേ എഴുതണ്ടെർനില്ല്യ ന്ന്‌ പിന്നീട്‌ തോന്നി)
ന്റമ്മേ.. ഇത്‌ വായിച്ചപ്പോ അവൻ എനിക്ക്‌ പേഴ്സണൽ ആയി എഴുതി:
"ഡോണ്ട്‌ ടോക്‌ എബൌട്‌ narrow mind or broad mind, മൈൻഡ്‌ യുവർ ബിസിനസ്സ്‌, i havent addressed it to you "

ഈശ്വരാ.. ഇതെന്ത്‌ കൂത്ത്‌. എന്നോടെന്തിന്‌ ചൂടാവണേ..

ഇവനോടൊന്നും പർഞ്ഞിട്ട്‌ കാര്യാല്ല്യാ എന്ന്‌ മനസ്സിൽ ഓർത്തെങ്കിലും അവനോട്‌ രണ്ട്‌ വാക്ക്‌ പരഞ്ഞില്ലെങ്കിൽ എനിക്ക്‌ ഇന്ന്‌ ഉറക്കം വരില്ല്യ ന്ന്‌ തോന്നിയത്‌ കൊണ്ട്‌ ഞാൻ ഇത്ര മാത്രം എഴുതി:"താങ്കലേ പോലെ ഇത്തരം ചിന്തഗതികൾ വെച്ച്‌ പുലർത്തുന്നവരോട്‌ ഒരു വാഗ്വാദത്തിന്‌ എനിക്ക്‌ താത്പര്യമില്ല"

ഇതിന്‌ മറുപടി എന്നോണം അവന്റെ ( ടി കക്ഷി ഒരു തെലുങ്കനാണ്‌ ) മെയിൽ കുറച്ച്‌ മുമ്പേ വന്നു.

അതിങ്ങനെ തുടങ്ങുന്നു..:

"മേ ബി അ യാം നാരോ മൈൻഡഡ്‌ .. ബട്ട്‌ യു ഡോണ്ട്‌ ഹാവ്‌ മൈൻഡ്‌ അറ്റ്‌ ആൾ ഓർ ബ്രൈൻലെസ്സ്‌ ..
ബീയിംഗ്‌ ഹൈലി എജൂക്കേറ്റഡ്‌, ഇൻസ്റ്റഡ്‌ ഓഫ്‌ പ്രൊട്ടക്റ്റിംഗ്‌ കോമ്മൺ പീപ്പിൾ ഫ്രം ദീസ്‌ സ്റ്റുപിഡ്‌ സ്വാമിജീസ്‌, യു ആർ എങ്കറേജിങ്‌ ദെം. ദാറ്റ്സ്‌ വൈ ഇൻഡ്യാസ്‌ കണ്ടീഷൻ ഈസ്‌ സ്റ്റിൽ സോ ബാഡ്‌. പീപ്പിൾ ലൈക്‌ യു ഷുഡ്‌ ബി ഷൂട്ടഡ്‌ അറ്റ്‌ സൈറ്റ്‌. .. അങ്ങനെ എന്തൊക്കെയോ ഇടക്കൊരു ഭീഷണിയും.. എന്നേ പോലെ ഉള്ള ആൾക്കാരേ കണ്ടാൽ ഉടനേ വെടി വെച്ച്‌ കൊല്ലണം ന്ന്‌

ഞാൻ അവന്‌ മറുപടി അയച്ചിട്ടില്ല്യ.. ഇത്തരം ആൾക്കാരോടൊക്കെ എന്ത്‌ പറയാനാ..
പിന്നെ ഭീഷണീം കൂടി മുഴക്കിയ സ്ഥിതിക്ക്‌.!!! ആന്ധ്രാ പ്രദേശിൽ ഇപ്പോഴും നക്സലൈറ്റ്‌കൾ ഉണ്ടെന്ന്‌ കേട്ടിട്ടുണ്ട്‌. ഇനിയിപ്പൊ ഇവൻ എങ്ങാനും ആ ഗ്രൂപ്പിൽ പെട്ടതാണോ..?

വെറുതേ എന്തിന്‌ നമ്മടെ തടി ബട്‌ക്കാക്കണേ..!!!

എനിക്ക്‌ ഇനീം ജീവിക്കണേ...!!! എന്റെ പല ആഗ്രഹങ്ങലും ഇത്‌ വരേ സാധിചിട്ടില്ല്യ.. ;-)
അതൊക്കെ കഴിഞ്ഞിട്ട്‌ തട്ടിപ്പോയാൽ മത്യേ...!!

ഞാൻ ഇത്‌ ഇവിടെ പറഞ്ഞതിന്റെ കാര്യം മറ്റൊന്നല്ല. ഭീഷണി ഉള്ള സ്ഥിതിക്ക്‌ എന്റെ ബ്ലോഗ്‌ എങ്ങാനും നിന്ന്‌ പോയാൽ.. ഞാൻ തട്ടി പോയി ന്ന്‌ അർത്ഥം.!!

ഭീഷണി ഉള്ള സ്ഥിതിക്ക്‌ പോലീസ്‌ പ്രോട്ടക്ഷൻ വേണമെന്ന്‌ ആവശ്യപ്പെടനോ ന്ന്‌ വരേ ഞാനിപ്പൊ ആലോചിക്കുന്നു.

വാൽക്കഷ്ണം:
ഇത്‌ ഞാൻ തമാശയായി പറഞ്ഞതല്ല. കാര്യമായിട്ട്‌ തന്നേ.. ഇന്ന്‌ സംഭവിച്ചതാണ്‌.

നോയ്‌ഷ്വാൻസ്റ്റെയ്ൻ കോട്ട

2005-10-01T03:51:00.000-07:00

Neuschwanstein എന്ന പേരുള്ള ഒരു കാസിൽ:
രണ്ട്‌ മാസം മുമ്പ്‌ നോയ്‌ഷ്വാൻസ്റ്റെയ്ൻ കോട്ട (കാസിൽ-ന്റെ മലയാളം കോട്ട ആണല്ലോ ല്ലേ..?) കാണാൻ പോയപ്പോ എടുത്ത്‌ ചില ചിത്രങ്ങൽ..

ലുഡ്വിഗ്‌ രാജാവിന്റെ പ്രസിദ്ധമായ ഈ കാസിൽ ജർമ്മനിയിലെ ബവേറിയ എന്ന് സംസ്ഥാനത്തിലെ ഫുസ്സൻ എന്ന സ്ഥലത്തിനടുത്താണ്‌

കാസിൽ നിന്നും പുറത്തേക്ക്‌ നോക്കുമ്പോളുള്ള ചില കാഴ്ച. പ്രസിദ്ധമായ ആൽപ്സ്‌ പർവ്വത നിരകളുടെ ഒരു ഭാഗവും കാണാം

ചെമ്പരത്തി

2005-10-01T03:36:00.000-07:00

ചെമ്പരത്തി പൂവേ ചൊല്ല്‌ ....

കാഴ്ച

2005-09-28T04:50:00.000-07:00

ഇത്‌ എന്റെ ഇല്ലം

ഇത്‌ എന്റെ അമ്മാത്ത്‌ (മുൻഭാഗം)

ഇത്‌ അമ്മാത്തെ പത്തായപ്പുര

ഇത്‌ ഞങ്ങളുടെ അമ്പലം (ചിറയിൽ ഭഗവതി)

ഇത്‌ ഞങ്ങളുടെ അമ്പലക്കുളം

ഫോട്ടോ..

2005-09-27T07:59:00.000-07:00

ലാസ്റ്റ്‌ പോസ്റ്റിൽ ഫൊട്ടോ വന്നില്ല്യ.. ഞാൻ ആഡ്‌ ചെയ്തതാ.. പക്ഷേ ബ്ലോഗ്‌ publish ചെയതപ്പൊ കാണാനില്ല്യ.. ഒരു ഐഡിയ ഇല്ലാ..
photo adding എങ്ങനാ ഒന്ന്‌ പരഞ്ഞ്‌ തരോ..?

ഇപ്പൊ തൽക്കാലം സമയം ഉള്ളവർക്ക്‌ കുറച്ച്‌ ചവറ് !!‌ ഫോട്ടോസ്‌ കാണണെങ്കില്‌
ഇതാ ഇവിടെ : http://hal.iwr.uni-heidelberg.de/~sreejith/spain_photos_index.html

ഒരു ഹൈഡൽബർഗ്‌ ഫോട്ടോ..

2005-09-27T07:46:00.000-07:00

ഇത്‌ ഹൈഡൽബർഗിലെ കാസിലും പഴയ പാലവും പിന്നെ നെക്കാർ എന്ന പേരുള്ള പുഴയും

അർത്ഥം പറഞ്ഞ~ തരോ..?

2005-09-26T01:28:00.000-07:00

ഈ implicitly, explicitly ഇതിന്റെ അർത്ഥം മലയാളത്തിൽ ആരേങ്കിലും ഒന്ന് പറഞ്ഞ~ തരോ.. അതിന്‌ തുല്യമായ മലയാള പദം ഉണ്ടോ..?

നന്ദി നമസ്കാരം

കേരളത്തിൽ ഇലക്ഷൻ

2005-09-25T02:47:00.000-07:00

ഇല്ലത്തേക്ക്‌ കഴിഞ്ഞ ആഴ്ച ഫോൺ വിളിച്ചപ്പൊഴും ഈ ആഴ്ച വിളിച്ചപ്പോളും അച്ഛ്നോട്‌ സംസാരിക്കാൻ പറ്റിയില്ല്യ. ഇനിയിപ്പൊ ഇലക്ഷൻ കഴിയോളം അച്ഛൻ തിരക്കിലായിരിക്കും എന്ന്‌ അമ്മ. കാരണം അച്ഛൻ ഇലക്ഷൻ പ്രചരണത്തിന്റെ തിരക്കിലാണത്രെ..
എന്റെ അച്ഛൻ ഒരു "സഖാവ്‌" ആണ്‌. കമ്മൂണിസ്റ്റ്‌. പണ്ടത്തെ ഇ. എം. എസ്‌ തരംഗത്തിൽ വീണ്‌ പോയതാ ന്നാ തോന്നണേ..

ഞങ്ങളുടെ വാർഡ്‌ ലെ ഇപ്പൊഴത്തെ മെമ്പർ അച്ഛനാണ്‌. ഞാൻ പല തവണ അച്ഛനോട്‌ പറഞ്ഞത ഈ രാഷ്ട്രീയം നമ്മക്ക്‌ പറ്റ്യെ പണി അല്ലാ ന്ന്‌. അപ്പോളൊക്കെ അച്ഛൻ പല ആദർശങ്ങളും പറഞ്ഞ്‌ എന്നോട്‌ തർക്കിക്കാൻ വരും. കാശുണ്ടാക്കാൻ മിടുക്കുള്ളവർകാണ്‌ രാഷ്ട്രീയം പറ്റൂ ന്നാ എന്റെ അഭിപ്രായം. പാവം ജനങ്ങളുടെ കണ്ണിൽ പൊടിയിടാൻ മിടുക്കു വേണം.. അച്ഛന്‌ ആ കാര്യത്തിൽ തീരെ മിടിക്കില്ലാ. കയ്യിൽ നിന്ന്‌ കാശു പോവാന്ന്‌ അല്ലാതെ.. രണ്ട്‌ കാശ്‌ സമ്പാദിക്കാൻ പറ്റീട്ടില്ല്യ.. നാട്ടുകാരെ സേവിക്കാണത്രെ.. നല്ല കാര്യൊക്കെ തന്നെ ആണ്‌. പക്ഷേ എന്തോ.. എനിക്കീ രാഷ്ട്രീയം തീരേ താത്പര്യം ഇല്ലാത്ത ഏരിയ ആണ്‌

കഴിഞ്ഞ പഞ്ചായത്ത്‌ ഇലക്ഷന്‌ മത്സരിക്കണ്ടാന്ന്‌ ഞങ്ങള്‌ കുറേ പറഞ്ഞതാ.. അപ്പോൾ നാട്ടുകാര്‌ പരഞ്ഞാൽ മത്സരിക്കാതിരിക്കാൻ പറ്റില്ല ന്നും പറഞ്ഞ്‌ മത്സരിച്ചു.. ജയിക്കും ചെയ്തു. ഇപ്രാവശ്യൊം മത്സരിക്കായിരുന്നു. പക്ഷേ ഞങ്ങളുടെ ഭാഗ്യത്തിന്‌ ഞങ്ങളുടെ വാർഡ്‌ വനിതകൾക്കായി സംവരണം ചെയ്തു.. ഭാഗ്യായി..

ഇലക്ഷൻ ന്റെ കാര്യം പറഞ്ഞപ്പള.. ഞാൻ ഇതു വരെ വോട്ട്‌ ചെയ്തിട്ടില്ല്യ. ഇലക്ഷൻ നടക്കുമ്പോളൊന്നും നാട്ടിൽ ഉണ്ടാവറില്ല.. അതാ.. കഴിഞ്ഞ പ്രാവശ്യം അച്ചൻ മത്സരിച്ചപ്പൊ വന്ന്‌ വോട്ട്‌ ചെയ്യണം ന്നൊക്കെ പറഞ്ഞതാ.. അന്ന്‌ ഞാൻ മദ്രാസിൽ ആയിരുന്നു. പക്ഷേ ഞാൻ പോയില്ല..

നാളെ ആണ്‌ ഞങ്ങളുടെ ഭാഗത്ത്‌ വോട്ടിംഗ്‌. ആര്‌ ജയിക്കോ ആവോ..

അല്ലെങ്കിലും ആര്‌ ജയിച്ചാൽ എന്താ.. ആര്‌ ജയിച്ചാലും തോറ്റാലും ഞാൻ പണിറ്റ്‌ത്താലല്ലേ എനിക്ക്‌ കഞ്ഞി കുടിക്കാൻ പറ്റൂ.. അതോണ്ട്‌ ഇനി അധികം ഒന്നും എഴുതുന്നില്ല്യാ..

മിനിഞ്ഞാന്‌ പ്രൊഫസ്സറ്‌ ഇൻദയറക്ട്‌ ആയീട്ട്‌ ഒന്നു സൂചിപ്പിച്ചു. മോനേ.. നല്ലോണം വർക്ക്‌ ചെയ്താൽ സമയത്ത്‌ പി എഛ്‌ ഡി തീർക്കാം ന്ന്‌ . ഞാനിപ്പൊ അതിന്റെ ചൂടിലാ..

അപ്പൊ പാക്കലാം...

ലാൽ സലാം സഖാക്കളേ..!! (വെറുതെ.. !!! അച്ഛൻ എങ്ങാനും ഈ ബ്ലോഗ്‌ വായിക്കാണെങ്കിൽ.. )

ലാൽ സലാം...

busy..

2005-09-24T07:01:00.000-07:00

രണ്ടൂസായിട്ട്‌ തിരക്കാണ്‌..

അപ്പൊ ഈ വഴി പിന്നെ വരാം..

വാക്കുകൾ സൂക്ഷിച്ച്‌ പ്രയോഗിച്ചില്ലെങ്കിൽ.

2005-09-22T00:41:00.000-07:00

ഞാൻ ബാംഗ്ലൂർ ഐ. ഐ. എസ്‌. സി. യിൽ ഒരു ആറ്‌ മാസം ഉണ്ടായിരുന്നു. ഒരു ദിവസം ഞാനും എന്റെ സുഹൃത്തായ നെയ്യാട്ടിൻകര സ്വദേശി ആദർശും കൂടി പുറത്തുള്ള ഒരു മലയാളി ഹോടലിൽ ഭക്ഷണം കഴിക്കാൻ പോയി. ഞങ്ങൾക്ക്‌ ഐ. ഐ. എസ്‌. സി. യിലെ മെസ്സിലെ ഭക്ഷണം ശരിക്കും മടുത്തിരുന്നു.

കൂട്ടത്തിൽ ഓഡർ ചെയത "കപ്പ" എത്തിയപ്പോൾ, ഞാൻ കുറേ കാലങ്ങൽക്കു ശേഷം അതു കണ്ട ആവേശത്തിൽ "ഹായ്‌...പൂള" എന്നുറക്കെ പറഞ്ഞു. ഇതു കേട്ടതും എന്റെ സുഹൃത്ത്‌ "ഛീ ഛേ... വൃത്തികേട്‌ പറയുന്നോടാ" എന്നും പറഞ്ഞ്‌ എന്നെ ചീത്ത വിളി തുടങ്ങി..
ഇതെന്ത്‌ കൂത്തപ്പാ്‌.. കഥയറിയാതെ കാര്യമറിയാതെ ഞാനും..
പിന്നെ അവൻ പറഞ്ഞപ്പളാ കാര്യം പിടികിട്ടിയത്‌. അവരുടെ നാട്ടിൽ "പൂള" എന്നുള്ളത്‌ ഒരു മോശം പദമാണത്രെ..

അതിന്‌ ഞാൻ എന്തു പിഴച്ചു.. എനിക്കതറിയോ.. ഞങ്ങളുടെ നാട്ടിൽ "മരിച്ചീനി അഥവ കപ്പ" എന്നു പറയുന്ന ഈ ഭക്ഷ്യ വസ്തുവിനെ വളരെ മാന്യമായി വിളിക്കുന്ന പെരാണ്‌ ഞാൻ പറഞ്ഞത്‌. അതു മറ്റു ചിലയിടങ്ങളിൽ മോശം പദമായതിന്‌ ഈ പാവത്തിനെ ചീത്ത വിളിച്ചത്‌ ശരിയായോ.... ആയോ.. ന്ന്‌ നിങ്ങള്‌ പറയൂ..

ഞാനും എന്റെ ഇംഗ്ലീഷും

2005-09-21T01:44:00.000-07:00

എന്റെ ഇംഗ്ലിഷ് ‌/ആംഗലേയ ഭാഷ പരിജ്ഞാനം കുറവാണ്‌ എന്ന തോന്നൽ എന്നെ അലട്ടാൻ തുടങ്ങിയത്‌ ഇന്നോ ഇന്നലോ അല്ലാ.. കുറേ കാലങ്ങളായിട്ട്‌ ഉള്ള ഒരുതരം കൊമ്പ്ലക്സ്‌ ആണ്‌. മലയാളം മീഡിയത്തിൽ പഠിച്ച എനിക്ക്‌ ഈംഗ്ലിഷ്‌ ന്റെ അടിത്തര അഥവാ ബേസിക്‌ തന്നെ ഇല്ല എന്നറിയാം. അതുകൊണ്ട്‌ തന്നെ പ്രീഡിഗ്രിക്കു നല്ലോണം ബുധിമുട്ടി. ഇംഗ്ലിഷ്‌ കഷ്ടി മുഷ്ടിച്ച്‌ മിനിമം മാർക്ക്‌ കിട്ടി പാസ്സായി. ഫിസിക്സ്‌, കണക്ക്‌, തുടങ്ങിയ വിഷയങ്ങൾ പസ്സാവാൻ സബ്ജക്ടിൽ വിവരം ഉണ്ടായാൽ മതി എന്നുള്ളതുകൊണ്ട്‌ തൽക്കാലം രക്ഷപ്പെട്ടു. എഞ്ചിനീയറിംഗിനു ചേർന്നിട്ടും കാര്യങ്ങൾക്ക്‌ വല്യേ മാറ്റമൊന്നും ഉണ്ടായില്ല്യ. കൂട്ടുകാർ പല വഴികളും ഉപദേശിച്ചു..
സ്ഥിരമായി ഇംഗ്ലിഷ്‌ പത്രം വായിക്കുക, ഇംഗ്ലിഷ്‌ ബുക്കുകൾ വായിക്ക, ഇംഗ്ലിഷ്‌ സിനിമ കാണാ.. തുടങ്ങിയവ..
ഇംഗ്ലിഷ്‌ സിനിമ കാണൽ പരിപാടി അധികം നടന്നില്ല.. എന്തോ.. എനിക്കറിയില്ല്യ.. കാണാൻ തീരേ താൽപര്യം തൊന്നിയില്ല്യ.. ഒരു പക്ഷേ മനസ്സിലാവാഞ്ഞിട്ടായിരിക്കും. അങ്ങനെ ആ പരിപാടി അവിടെ നിർത്തി.. ഇപ്പൊ ഇംഗ്ലിഷ്‌ സിനിമ കാണൽ വെറും "അഡൽട്‌ ഓൺലി" കാറ്റഗറിയിൽ ഒതുങ്ങി. അതിനിപ്പൊ ഭാഷാ പരിജ്ഞാനം വേണമെന്നില്ലല്ലോ..

പിന്നെ പത്രം, ബുക്ക്‌ വായന.. സ്ഥിരമായിട്ടില്ലെങ്കിലും ഇടക്കൊക്കെ വായിക്കും. അതുകൊണ്ട്‌ ഇപ്പൊ ഇംഗ്ലിഷ്‌ വായിച്ചാൽ നല്ലവണ്ണം മനസ്സിലാകും. കുറേയൊക്കെ കേട്ടാലും.. പക്ഷേ ആക്സന്റ്‌ ഇൻഡ്യനോ മല്ലുവോ ആവണം.. അല്ലെങ്കിൽ കുറച്ച്‌ ബുധിമുട്ടാ..
സംസാരത്തിനിടയിൽ ചിലപ്പൊ സന്ദർഭത്തിനു യോജിച്ച ഇംഗ്ലിഷ്‌ പദം കിട്ടാതേ ഞാൻ പലപ്പോഴും "ബ്‌ ബ്‌ ബ്ബ" അടിച്ചിട്ടുണ്ട്‌ പിന്നീട്‌ അതിനെപറ്റി ആലോചിച്ച്‌ വേവലാതിപ്പെട്ടിട്ടും ഉണ്ട്‌

‌ മൂന്ന്‌ നാല്‌ മാസം മുമ്പ്‌ ഞാൻ ഒരു ബ്ലോഗിംഗ്‌ ശ്രമം തുടങ്ങിയതാ പക്ഷേ ഒരു ആത്മവിശ്വാസക്കുറവ്.‌ മറ്റുള്ളവർ എഴുതുന്നതു പോലെ ഇംഗ്ലിഷ്‌ നന്നായി എനിക്ക്കെഴുതാൻ വയ്യല്ലോ എന്ന ഒരു തോന്നൽ.. അങ്ങനെ ആ പരിപാടി നിർത്തി.. അങ്ങനെ ഇരിക്കുമ്പളാ മലയാളം ബ്ലോഗിങ്ങിനെ പറ്റി കേട്ടത്‌ ഇപ്പൊ അതും തുടങ്ങി.. ഞാൻ ഹാപ്പി ആയി..

എന്നാലും ഒരു ചോദ്യം എന്റെ മനസ്സിൽ കിടന്ന്‌ പുളയുന്നു
ഇംഗ്ലിഷ്‌ ഭാഷ കൈകാര്യം ചെയ്യനുള്ള കഴിവ്‌ ഇനി എങ്ങനെ വർധ്ധിപ്പിക്കും.. എന്നെ സംബന്ധിച്ചിടതോളം അതു വളരേ പ്രധാനമാണ്‌ പി ഛ്‌ ഡി ഒക്കെ ചെയ്യുമ്പോൽ കോൺഫറൻസ്‌ ഒക്കെ പങ്കെടുക്കുകയും പ്രബന്ധങ്ങൾ അവതരിപ്പിക്കുകയും ചെയ്യേണ്ടി വരും.. അതിന്‌ ഇംഗ്ലിഷ്‌ ഭാഷ നന്നായി സംസാരിക്കാനും കൈകാര്യം ചെയ്യാനും സാധിക്കണം..

ഈശ്വരോ രക്ഷ..

നാളികേരവും മലായാളിയും

2005-09-20T05:47:00.000-07:00

മലയാളിയും നാളികേരവും തമ്മിലുള്ള ബന്ധം തെലുങ്കന്മാർക്ക്‌ പറഞ്ഞാൽ മനസ്സിലാവോ..? ആവോന്ന്‌... ?
ആവില്ല്യ.. ആവൂച്ചാ എന്റെ ഒരു തെലുങ്കൻ സുഹൃത്ത്‌ എന്നോടീ ചോദ്യം ചോദിക്കോ..

എന്തു കറി വെച്ചാലും അതിൽ തേങ്ങ അരച്ച്‌ ചേർക്കുന്ന എന്റെ സ്വഭാവം കണ്ട്‌ ഒരു ദിവസം അവൻ..
നിങ്ങൾ മലയാളികൾ എന്തു കറി ഉണ്ടാക്കിയാലും അതിൽ തേങ്ങ ചേർക്കോ...?
മൊനേ.. തെലുങ്കാ.. "എന്ത്‌ കറി.. ന്ന്‌ പറഞ്ഞാ.." ഒരുവിധം എല്ലാ കറികളിലും നാളികേരം- അതായത്‌ വെളിച്ചെണ്ണ ആയോ, തേങ്ങാപാല്‌ ആയോ, തേങ്ങാ പൊടി ആയോ,തെങ്ങ ചമ്മന്തി ആയോ ഞങ്ങൾ ചേർക്കും..

ഇതു കേട്ട തെലുങ്കൻ..
you cook with coconut oil..?? എന്ന ചോദ്യത്തോടൊപ്പം "ഈീ ഏ" എന്ന ഒരു വികൃത സ്വരവും പുറപ്പെടുവിച്ചുകൊണ്ട്‌ എന്നെ നോക്കി..

ആ ശബ്ദം കേട്ട ഞാൻ എന്നെ തന്നെ control ചെയ്ത്‌ കൊണ്ട്‌ വളരെ സൌമ്യമായി പറഞ്ഞു..

നിങ്ങളുടെ കടുകെണ്ണയേക്കാളും എത്രയോ ഭേദാണീ വെളിച്ചെണ്ണ..

അപ്പോളാണവൻ കൂരമ്പു പോലെ ഈ ചോദ്യം എറിഞ്ഞത്‌

നാളികേരം ഉണ്ടായിരുന്നില്ലെങ്കിൽ നിങ്ങൾ മലയാളികൾ എങ്ങിനെ ജീവിക്കും..

എടോ തെലുങ്കാ..
ഞാൻ അൽപം ഗദ്‌ഗദത്തോടെ .. മുഖത്ത്‌ കുറച്ച്‌ നാടകീയത ഒക്കെ വരുത്തി പറഞ്ഞു..

നീ ഈ ചോദ്യം എന്നോട്‌ ചോദിച്ചത്‌ പോട്ടെ.. പക്ഷേ വേറൊരു മലയാളിയോടും ഇനി ഈ ചോദ്യം ചോദിക്കരുത്‌.. ഒരു മലയാളിക്കും ഈ ചോദ്യം താങ്ങാനാവില്ല..
നാളികേരമില്ലാത്ത ഒരു ലോകത്തെ പറ്റി മലയാളിക്ക്‌ ചിന്തിക്കാൻ കൂടി പറ്റില്ല.. നാളികേരത്തിന്‌ മലയാളിയും മലയാളിക്ക്‌ നാളികേരവും ഇല്ലാതെ പറ്റില്ല സുഹൃത്തേ..

എന്റെ നാളികേര സ്നേഹം കേട്ട്‌ wonder അടിച്ച തെലുങ്കൻ പിന്നീട്‌ ഒരു ദിവസം വെള്ളടിച്ച്‌ ഫിറ്റായി എനിക്കുണ്ടാക്കിയ ചായയിൽ തേങ്ങാപാൽ ഒഴിക്കാൻ ശ്രമിച്ചതും, അതു തടയാൻ ചെന്ന എന്റെ മറ്റൊരു സുഹൃത്തിനെ അടിക്കാനായി കൈ വീശിയതും, അടികൊള്ളാതിരിക്കാൻ വേണ്ടി അവൻ കുനിഞ്ഞതും, അപ്പൊ ആ അടി എന്റെ മുഖത്ത്‌ വീണതും, അടികൊണ്ട്ട ഞാൻ അവനെ മലയാളത്തിൽ "പൂര" തെറി വിളിച്ചതും എല്ലാം ഇതിന്റെ ബാക്കി പത്രം..

പംക്തി

2005-09-19T13:01:00.000-07:00

ഈ പംക്തി എന്ന പ്രയോഗം ശരിയാണോ..? ഞാൻ ഒരു ജാടക്കങ്ങട്‌ അങ്ങനെ ഇട്ടു ന്നേ ഉള്ളൂ.. മലയാള പണ്ഡിതന്മാരേ തെറ്റുണ്ടെങ്കിൽ തിരുത്തണേ...

ചൊവ്വാ പുരാണം

2005-09-19T06:52:00.000-07:00

ഇന്നാള്‌ ഇല്ലത്ത്‌ വിളിച്ചപ്പളാ അമ്മ എന്നെ ചൊവ്വാ ദശേടെ കാര്യം ഓർമ്മിപ്പിച്ചത്‌.
.. കുട്ടന്‌ ഇപ്പൊ ചൊവ്വാ ദശേടെ അവസാന കാലമാണ്‌ ചൊവ്വയ്ക്ക്‌ ഇപ്പൊ ശക്തി കൂടും കാര്യങ്ങളൊന്നും വിചാരിക്കണമാതിരി നടക്കണമെന്നില്ല. എല്ലാത്തിനും ഒരു മുട്ടിത്തിരിച്ചിൽ അഥവാ പ്രതിബന്ധം ണ്ടാവും. അതുകൊണ്ടു വിഷമിക്കണ്ടാ. ഞങ്ങൾ ഇവിടെ വഴിപാടുകൾ ഒക്കെ കഴിക്കുന്നുണ്ട്‌ എല്ലാം ശരിയാവും.. ഇതു കഴിഞ്ഞാൽ പിന്നെ നല്ല സമയാണത്രെ.. എന്നൊക്കെ..
എന്നാ നല്ല സമയം തുടങ്ങണെ..?
അതു അടുത്തകൊല്ലം ഏപ്രിൽ മുതൽ...

ഹും.. അപ്പൊ എന്നെ പിന്നെ പിടിച്ചാൽ കിട്ടില്ല്യ ന്നർഥം..

ചൊവ്വ എന്നെ ഇടം കണ്ണിട്ടു നോക്കാൻ തുടങ്ങ്യെ കാര്യം എനിക്കറിയാമായിരുന്നു.. പക്ഷേ അങ്ങേരുടെ നോട്ടത്തിനു ശക്തി കൂടിയ വിവരം ഞാൻ അറിഞ്ഞിരുന്നില്ല്യ..

ഇപ്പൊ ഏതായാലും എല്ലാത്തിനും ഒരു കാരണം കിട്ടീലോ.. ചൊവ്വ.. കുറച്ചു കാലമായിട്ട്‌ കാര്യങ്ങൾ ഒന്നും വേണ്ട രീതിയിൽ പോണില്ല്യ എന്നൊരു തോന്നൽ ഉണ്ടായിരുന്നു.. അപ്പൊ അതീ ചൊവ്വേടെ കളി ആണല്ലേ... അങ്ങനെ വരട്ടേ..

രണ്ട്‌ ദിവസം മുൻപ്‌ എന്റെ professor

ആ program ready ആയോ..?

ഇല്ല്യ സാർ.. അതു compile ചെയ്യുന്നില്ല

അതെന്താ..?

ഇപ്പൊ ചൊവ്വാ ദശാണ്‌ സാർ..

ങേ...

സാർ.. എന്റെ സമയം ഇപ്പൊ ശര്യല്ല.. അതുകൊണ്ട്‌ പ്രോഗ്രാം ചിലപ്പൊ compile ചെയ്യില്ല
പേടിക്കണ്ട സാർ.. ഇതു കഴിഞ്ഞാ പിന്നെ നല്ല സമയാ..
അത്യോ.. എന്നു മുതലാ..
അടുത്ത ഏപ്രിൽ..

സാർ എന്നെ ഒന്നു നോക്കി.. ഹം.. തിരിഞ്ഞു നടന്നു..

പെട്ടന്നാണ്‌ ഞാൻ ഓർത്തത്‌..
ചൊവ്വ വിചാരിച്ചാൽ ചിലപ്പൊ phd funding വരെ cancel ചെയ്യിപ്പിക്കാൻ പറ്റും...

സാറേ.... ഞാൻ നീട്ടി ഒന്നു വിളിച്ചു..
അതേ.. നാളെ program compile ചെയ്യും..
അതെന്താ..
അതു പിന്നെ നാളെ ചൊവ്വേടെ ശക്തി കുറയും സാർ..
ങേ..
നാളെ വ്യാഴവും ശുക്രനും എന്നെ ഒളി കണ്ണിട്ട്‌ നോക്കും... അപ്പൊ പിന്നെ ചൊവ്വ നോക്ക്യാലും പ്രശ്നല്ല്യ... അതെന്നെ..

ചൊവ്വാ പുരാണം ഇവിടെ സമാപ്തം!
--------------------------
എന്റെ ചൊവ്വാ ഭഗവതി.. എന്നെ കാക്കണേ..

എന്റെ ബ്ലോഗീശ്വരാ

2005-09-19T04:37:00.000-07:00

എന്റെ ബ്ലോഗീശ്വരാ.. എനിക്ക്‌ control തരൂ... മലയാളം ബ്ലോഗിൽ എഴുതി തുടങ്ങിയതിൽ പിന്നെ ഞാൻ full time മറ്റു ബ്ലോഗുകൾ കയറി ഇറങ്ങുകയാണ്‌..
എന്റെ സകല നിയന്ത്രണങ്ങളും വിട്ടു പോയെന്നാ തോന്നണേ..
ഈ പോക്ക്‌ പോയാൽ എന്റെ PhD ഒരു അര്‌ക്കാവും.. ബ്ലോഗീശ്വരാ... ഞാൻ കൈവിട്ടു പോവോ..?? എന്നെ നിയന്ത്രിക്കില്ലേ.... നിയന്ത്രിച്ചില്ലെങ്കിൽ ഈ പാവം വഴിയാധാരം ആവും ട്ടോ ...

ആവേശം

2005-09-18T08:18:00.000-07:00

ഇന്നു ഒരു ആവേശത്തിന്റെ പുറത്ത്‌ കുറേ എഴുതി എന്നേ ഉള്ളൂ. പഠിത്തത്തിന്റെ അഥവാ ഗവേഷണത്തിന്റെ (PhD ;-)(ഗവേഷണം എന്നൊക്കെ ഒരു ജാടക്കാണ്‌ ട്ടോ) ഇടയിൽ എത്രത്തോളം സമയം കിട്ടും എന്നെനിക്കറിയില്ല്യ. സമയം കിട്ടുമ്പോളൊക്കെ ഞാൻ ഈ പംക്തിയിൽ എഴുതാൻ ശ്രമിക്കാം..

പുല്ലൂരാൻ

ആരംഭ ശൂരത്തം

2005-09-18T07:57:00.000-07:00

തുടങ്ങിയ സ്തിതിക്ക്‌ ഞാൻ ഇന്നു എഴുതി തകർക്കുകയാണ്‌..
ഇതു വെറും ആരംഭശൂരത്തമാണോ..? എന്നാണെന്റെ സംശയം !!

ബ്ലോഗ്

2005-09-18T07:44:00.000-07:00

ഈ "ബ്ലോഗി" ന്റെ മലയാളം പദം എന്താണാവോ?

എന്റെ ആദ്യത്തെ മലയാളം ബ്ലോഗ്‌ എഴുത്ത്‌

2005-09-18T07:04:00.000-07:00

സ്നേഹിതരേ,

മലയാളം ബ്ലോഗ്‌ എന്ന അത്ഭുത ലോകത്തെ കുറിച്ചു കേട്ടപ്പോൽ എന്താണെന്നറിയാനുള്ള ആകാംക്ഷ ആയിരുന്നു കുറേ കാലമായിട്ട്‌. സിബു-വിന്റെയും പെരിങ്ങോടന്റെയും സഹായത്തോടെ എന്റെ കമ്പൂട്ടറിൽ (computer with debian linux) മലയാളം unicode font install ചെയ്തു, കൂടാതെ വരമൊഴി-യും. മനോജിന്റെ മലയാളം ബ്ലോഗ്‌ റോളിൽ കൂടി പല ബ്ലോഗുകളും സന്ദർശിച്ചു. ചില മലയാളം ബ്ലോഗുകൾ എത്ര വായിച്ചാലും മതി വരുന്നില്ല. ഇപ്പൊ മലയാളം ബ്ലോഗിങ്ങിനു വേണ്ട എല്ലാ സാമഗ്രികളും കയ്യിൽ കിട്ടിയ സ്തിതിക്കു ഇനി എന്തൊകൊണ്ടു ഈ വിസ്മയ ലോകതിൽ ഒരു അംഗമായികൂട എന്നുള്ള തോന്നലാണ്‌ എന്റെ മനസ്സ്‌ മുഴുവൻ.

"സു", പെരിങ്ങോടൻ, വിശ്വം, സിബു, ഉമേഷ്‌, കലേഷ്‌, ചിന്ത,കെവിന്‌ തുറ്റങ്ങിയവരുടെ മലയാളം ബ്ലോഗുകൾ എനിക്കു വളരെ ഇഷ്ടമാണ്‌. അതു പോലെ എനിക്കും എഴുതി തുടങ്ങണം എന്നുള്ള ആഗ്രഹം. പ്രിയ സ്നേഹിതരെ ബ്ലോഗിംഗ്‌ എന്ന കലയിൽ വെറും ഒരു ശിശു ആയ എനിക്കു നിങ്ങളുടെ എല്ലാം സഹായങ്ങൾ വേണം. i welcome all tips and ticks to enhance the blog and ofcourse the varamozhi tips. വരമൊഴി ഭാഷ പഠിച്ചു തുടങ്ങിയതേ ഉള്ളൂ. അതുകൊണ്ടു അക്ഷര പിശകുകൾ ധാരാളം വരാനുള്ള സാധ്യത ഉണ്ട്‌. സദയം ക്ഷമിക്കുക.

എന്ന്‌
നിങ്ങളുടെ എല്ലാം
സ്വന്തം
പുല്ലൂരാൻ

~~~~~~~::പുല്ലൂരിന്റെ പംക്തി::~~~~~~~